ნავთობის ბაზრის ანალიტიკოსები ფიქრობენ, რომ ფასის მნიშვნელოვან ზრდას, ხელს აშშ-ში ფიქალური ნავთობის მოპოვების ბუმი და გლობალური ეკონომიკის გამოფიტვა უშლის. ეს ფაქტორი OPEC-ის მცდელობას, ბაზარზე მიწოდების შეზღუდვით ფასის ზრდას შეუწყოს ხელი, ნაწილობრივ ანეიტრალებს.

„როიტერსმა“ ნავთობის ბაზრის 36 ეკონომისტი და ანალიტიკოსი გამოკითხა და მათ ფასის პროგნოზირება სთხოვა. მათი პროგნოზით, ბრენტის საშუალო ფასი 2019 წელს 66.44 დოლარის ფარგლებში იქნება. იანვარში ჩატარებული გამოკითხვით, საშუალო სავარაუდო ფასი 67.32 დოლარი იყო. ჯერჯერობით, წელს ბრენტის საშუალო ფასი 62 დოლარის ფარგლებშია.

„როიტერსი“ ეკონომისტების და ანალიტიკოსების გამოკითხვას ყოველთვე ატარებს და უკვე ზედიზედ ოთხი თვეა, რაც პროგნოზული ფასი კლებულობს. იმ შემთხვევაში, თუ ნავთობის ექსპორტიორი ქვეყნების ორგანიზაცია (OPEC) და მისი არაწევრი ქვეყნები, მიწოდების კიდევ უფრო მეტად შეკვეცას გადაწყვეტენ, ეს ფასის მკვეთრ ზრდას გამოიწვევს, მაგრამ ანალიტიკოსები დარწმუნებულები არიან, რომ მოკლევადიან პერსპექტივაში, ფასის მნიშვნელოვანი ზრდა მოსალოდნელი არ არის.

ნავთობის მსხვილი მომპოვებლები და მწარმოებლები 17-18 აპრილს ვენაში შეხვედრას ჩაატარებენ, რა დროსაც, მიწოდების შემდგომი შეკვეცის საკითხს განიხილავენ. როგორც „კომერცბანკის“ სასაქონლო ბაზრის უფროსი ანალიტიკოსი კარსტენ ფრიჩი ამბობს, საუდის არაბეთი მიწოდების უფრო მკვეთრად შეკვეცას ემხრობა, რითაც მოთხოვნა-მიწოდების დაბალანსების იმედი აქვს.