2019 წლის 14 მარტს, თბილისში, რძის სექტორის მესამე კავკასიური კონგრესი გაიმართება. დასასწრებად მოგვწერეთ: office@georgiandairy.org

ღონისძიება ორგანიზებულია გაეროს სურსათისა და სოფლის მეურნეობის ორგანიზაციის (FAO), ევროპის რეკონსტრუქციისა და განვითარების ბანკისა (EBRD) და საქართველოს მერძევეობის ასოციაციის მიერ, საქართველოს გარემოს დაცვისა და სოფლის მეურნეობის სამინისტროსა და ევროკავშირის მხარდაჭერით.

ღონისძიებას გახსნიან საქართველოს გარემოს დაცვისა და სოფლის მეურნეობის მინისტრი - ლევან დავითაშვილი, საქართველოში FAO-ს, EBRD-სა და ევროკავშირის წარმომადგენლები.

ღონისძიებაზე გაიმართება 2018 წელს მესაქონლეობის შესახებ საუკეთესო ჟურნალისტური ნამუშევრის კონკურსზე გამარჯვებულების დაჯილდოვება.

კონგრესში მონაწილეობას მიიღებს სარძეო კომერციული ფერმების, გადამამუშავებელი საწარმოების, დარგობრივი ასოციაციების, მომსახურების მომწოდებლების, ხელისუფლების, დარგით დაინტერესებული პოტენციური ინვესტორებისა და საერთაშორისო ორგანიზაციების 200-ზე მეტი წარმომადგენელი საქართველოდან და უცხოეთიდან.

კონგრესზე განსაკუთრებული ყურადღება გამახვილდება რძის ბიზნესში არსებულ ადგილობრივ და გლობალურ ტენდენციებზე, რძის სექტორში უვნებლობისა და გარემოზე ზემოქმედების საკითხებს. ღონისძიების მნიშვნელოვანი ნაწილი დარგის უცხოელ ექსპერტებს დაეთმობათ, რომლებიც კონგრესის დამსწრეებს მერძეული ფერმის ეფექტური მართვის თანამედროვე მიდგომებს, მეთოდებს და სიახლეებს გააცნობენ.

მონაწილეებს საშუალება ექნებათ გაეცნონ მერძეული მესაქონლეობის სფეროში არსებულ მოწინავე ტექნოლოგიურ სიახლეებს და პრაქტიკულ მაგალითებს რეგიონის რძის მწარმოებლებისა და ფერმერული ორგანიზაციების გამოცდილებაზე დაყრდნობით.