"ქვეყანა, რომლის ეკონომიკაც სოლიდური ტემპით იზრდება და მსოფლიო ბანკის ბიზნესის კეთების რეიტინგის ათეულშია", - ასე წარადგინა Financial Times-ის ჯგუფში შემავალი გამოცემა „fDi magazine“-ი საქართველოს და ფინანსთა მინისტრს.

ივანე მაჭავარიანმა ვრცლად მიმოიხილა ტურიზმის სფერო და მისი დივერსიფიკაციის საჭიროებას გაუსვა ხაზი. რაც შეეხება ბიზნესის კეთების რეიტინგში დაწინაურებას, მინისტრმა საქართველოს დადებით ბიზნესგარემოზე გაამახვილა ყურადღება.

საუბარი ასევე შეეხო ეკონომიკის დივერსიფიკაციის მნიშვნელობასაც, რომლის დამსახურებით ბოლო წლებში ექსპორტის მნიშვნელოვანი ზრდა შეინიშნება. ივანე მაჭავარიანის განცხადებით, სამომავლოდ მნიშვნელოვანია პრემიერმინისტრის დაანონსებულ საგანმანათლებლო ინიციატივაზე მუშაობა, რაც საქართველოს თავიდან ააცილებს პრობლემას, რასაც ხშირად აწყდებიან საშუალო შემოსავლის მქონე ქვეყნები. 

ინტერვიუ ფიჯის რესპუბლიკაში, აზიის განვითარების ბანკის (ADB) ყოველწლიური შეხვედრის ფარგლებში შედგა, სადაც ფინანსთა მინისტრი, ივანე მაჭავარიანი აზიის განვითარების ბანკში საქართველოს მხრიდან მმართველის სტატუსით მონაწილეობდა.

ფინანსთა მინისტრთან ინტერვიუ გამოცემის რედაქტორის მოადგილემ ჯაკოპო დეტონმა ჩაწერა.