თბილისის ტურისტული პოტენციალის გაზრდისა და ტურიზმის სფეროში ხარისხის გაუმჯობესების მიზნით, თბილისის მერია „გალტ ენდ თაგარტთან“ პარტნიორობით სემინარს გამართავს.

როგორც თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა, სემინარი 9 ივლისს იგეგმება.

„დედაქალაქის ტურისტული პოტენციალის გაზრდისა და ამ სფეროში ხარისხის გაუმჯობესების მიზნით, თბილისის მერია პერიოდულად ატარებს მასტერკლასებსა და სემინარებს ტურიზმის სფეროს წარმომადგენლებისთვის. ამჯერად, 9 ივლისს, კომპანია „გალტ ენდ თაგარტთან“ პარტნიორობით ვგეგმავთ სემინარს, რომელიც შეეხება მცირე და საშუალო განთავსების ობიექტების მიმოხილვას, ფასების დინამიკას, კონკურენციას, დატვირთვას, ტურისტულ ელექტრონულ პლატფორმებს, ასევე, სასტუმროების პოზიციონირებას, კრიზისული პერიოდების მართვას, სპეციალურ საბანკო პროდუქტებს, დონორების პროგრამებს“, – განაცხადა კახა კალაძემ.

ამასთან, თბილისის მერმა თანამშრომლობისთვის მადლობა გადაუხადა „საქართველოს ბანკს“.

„საქართველოს ბანკის“ წარმომადგენლები ისაუბრებენ ციფრული ტექნოლოგიების გამოყენების თაობაზე, რაც დამეთანხმებით, ნებისმიერი ბიზნესისთვის დიდი ხანია, აუცილებლობად იქცა“, – განაცხადა კალაძემ.

მისი შეფასებით, სემინარი ძალიან დაეხმარება მცირე და საშუალო განთავსების ობიექტების მენეჯერებსა და თანამშრომლებს.

„მსგავსი სემინარები ორ-სამ კვირაში ასევე ჩატარდება გიდებისთვის და „აერბიენბისა“ (Airbnb) და „ბუქინზე“ (booking) განთავსებული ბინების მეპატრონეებისთვისაც“, – განაცხადა თბილისის მერმა, კახა კალაძემ დედაქალაქის მთავრობის სხდომაზე.