აზერბაიჯანიდან საქართველოში გაზის მიწოდება შესაძლოა, 11%-ით გაიზარდოს - ამის შესახებ Trend-ს აზერბაიჯანის სახელმწიფო კომპანია SOCAR-ში განუცხადეს.

როგორც Day.az წერს, 2019 წლის ორ თვეში აზერბაიჯანის სახელმწიფო კომპანია SOCAR-მა საქართველოში 500 მილიონი კუბური მეტრი ბუნებრივი აირის იმპორტი განახორციელა. წლის ბოლომდე მიწოდება 1,260 მლრდ კუბურ მეტრს შეადგენს.

SOCAR-ში აცხადებენ, რომ 2019 წელს სახელმწიფო ნავთობკომპანია ყველა პრობლემის გათვალისწინებით საქართველოს დაახლოებით 2,45 მილიარდ კუბურ მეტრ ბუნებრივ აირს მიაწვდის, რაც 2018 წლის მაჩვენებელზე 11%-ით მეტია.

რაც შეეხება ავტოგასამართ სადგურებს (აგს), ბოლო მონაცემებით SOCAR-ი საქართველოში 113 აგს ფლობს.

SOCAR-ი საქართველოში აზერბაიჯანის საბადოებიდან მოპოვებული ბუნებრივი აირის ექსპორტს ახორციელებს. როგორც კომპანიაში აცხადებენ, გაზის მოპოვება ხდება „შაჰ დენიზის“ საბადოზე, აზერბაიჯანის სახელმწიფო კომპანიის და უცხოელი ინვესტორების მონაწილეობით.

ამ დროისათვის SOCAR-ი საქართველოში როგორც ბუნებრივი აირის ძირითადი მომწოდებელია, ასევე ახორციელებს ქვეყანაში ნავთობის და ნავთობპროდუქტების იმპორტს.