საქართველოს სავაჭრო-სამრეწველო პალატა, მაღალმთიანი რეგიონების განვითარების პოლიტიკის შემუშავების მიზნით გამართულ საჯარო დისკუსიების ციკლში მონაწილეობს. ღონისძიებების სერია, საქართველოს რეგიონული განვითარებისა და ინფრასტრუქტურის სამინისტროს ინიციატივით დაიგეგმა, რომლის ფარგლებშიც, საჯარო განხილვები 4 მუნიციპალიტეტში ტარდება, ესენია- შუახევი, მესტია, ცაგერი და ყაზბეგი.

ღონისძიების მიზანია, მაღალმთიანი რეგიონების განვითარების პოლიტიკის შემუშავების პროცესში ადგილობრივი დაინტერესებული მხარეების ჩართულობის უზრუნველყოფა, როგორებიც არიან- ადგილობრივი საზოგადოებრივი ორგანიზაციები, ბიზნეს-სექტორის წარმომადგენლები, ფერმერები. საქართველოს სავაჭრო-სამრეწველო პალატა, რომელსაც, რეგიონული წარმომადგენლობების ფართო ქსელი გააჩნია, პროექტის მხარდამჭერი და ადგილობრივ ბიზნესთან კომუნიკაციის მთავარი დასაყრდენია.

პალატის მომსახურებისა და რეგიონული განვითარების დეპარტამენტის დირექტორმა გიორგი ვეკუამ, შუახევში გამართულ დისკუსიაში მაღალმთიან რეგიონებში სამეწარმეო საქმიანობის მხარდაჭერისა და მეწარმეთა პროფესიული განვითარების შესაძლებლობების თემაზე გააკეთა მოხსენება. ღონისძიებაზე ასევე საკუთარი პრეზენტაციებით წარსდგნენ, რეგიონული განვითარებისა და ინფრასტრუქტურის სამინისტრის მოადგილე მზია გიორგობიანი, სასოფლო-სამეურნეო კოოპერატივების განვითარების სააგენტოს თავმჯდომარე გიორგი მიშელაძე,  სააგენტო ,,აწარმოე საქართველოში“ ხელმძღვანელი მიხეილ ხიდურელი. 

ღონისძიებათა ციკლის დასრულების შემდეგ, მომზადდება კონკრეტული რეკომენდაციების ანგარიში, თუ როგორი უნდა იყოს ადგილობრივების საჭიროებებზე მორგებული მაღალმთიანი რეგიონების განვითარების პოლიტიკა.